அறிவியல் மற்றும் தொழில்நுட்பத்தை கிராமங்களுக்குக் கொண்டு சென்று கிராமிய உற்பத்திகளின் தரம் மற்றும் நன்மதிப்பை உயர்த்துவோம்..

அறிவியல் மற்றும் தொழில்நுட்ப அமைச்சின் வழிகாட்டுதலின் கீழ், களுத்துறை மாவட்ட விதாத்தா (Vidatha) பிரிவினால் ஏற்பாடு செய்யப்பட்ட விதாத்தா தொழில்முயற்சியாளர் கண்காட்சி மற்றும் புத்தாக்க மருத்துவ முகாம் (Innovation Clinic), அறிவியல் மற்றும் தொழில்நுட்ப அமைச்சர் பேராசிரியர் கிருஷாந்த அபேசேன அவர்களின் தலைமையில் களுத்துறை மாவட்ட செயலகத்தில் நடைபெற்றது.

அறிவியல் மற்றும் தொழில்நுட்பத் துறை சார்ந்த புத்தாக்கங்களை ஊக்குவித்தல், கிராமிய தொழில்முயற்சியை வலுப்படுத்துதல், உள்நாட்டு உற்பத்திகளை மக்கள் மயப்படுத்துதல் மற்றும் சிறு மற்றும் நடுத்தர அளவிலான தொழில்கள் மற்றும் வணிக மேம்பாட்டின் போது தொழில்முயற்சியாளர்கள் எதிர்கொள்ளும் தொழில்நுட்பப் பிரச்சினைகளுக்கு ஆலோசனைச் சேவைகள் மற்றும் தீர்வுகளை வழங்குவதை நோக்கமாகக் கொண்டு, அறிவியல் மற்றும் தொழில்நுட்ப அமைச்சினால் இந்தத் திட்டம் மாவட்ட மட்டத்தில் செயல்படுத்தப்பட்டு வருகிறது.

களுத்துறை மாவட்டத்திற்குட்பட்ட 14 பிரதேச செயலகப் பிரிவுகளில் அமைக்கப்பட்டுள்ள விதாத்தா வள நிலையங்களின் ஊடாக உருவான சிறு மற்றும் நடுத்தர அளவிலான தொழில்முயற்சியாளர்களின் உற்பத்திகள் மற்றும் புதிய கண்டுபிடிப்பாளர்களின் பல படைப்புகள் இக்கண்காட்சியில் காட்சிப்படுத்தப்பட்டிருந்தன. கண்காட்சிக்கு மேலதிகமாக நடைபெற்ற புத்தாக்க மருத்துவ முகாமில், புதிய கண்டுபிடிப்புகள் மற்றும் புத்தாக்கப் படைப்புகளை உருவாக்கும் போது இளம் கண்டுபிடிப்பாளர்கள் எதிர்கொள்ளும் பிரச்சினைகள் மற்றும் சிரமங்களுக்குத் தொழில்நுட்பத் தீர்வுகளைப் பெற்றுக்கொள்வதற்கான வழிகள் குறித்து ஆலோசனைகள் வழங்கப்பட்டன. இதற்காக தேசிய புத்தாக்க முகவர் நிறுவனம் (National Innovation Agency), தேசிய அறிவுசார் சொத்து அலுவலகம், தொழில்துறை தொழில்நுட்ப நிறுவனம் (ITI), நவீன தொழில்நுட்பத்திற்கான ஆத்தர் சி. கிளார்க் நிறுவனம் மற்றும் தேசிய அறிவியல் அறக்கட்டளை (NSF) ஆகிய நிறுவனங்களின் வள பங்களிப்பு வழங்கப்பட்டிருந்தது.

இங்கு உரையாற்றிய அமைச்சர் பேராசிரியர் கிருஷாந்த அபேசேன,

அறிவியல் மற்றும் தொழில்நுட்பத்தை கிராமங்களுக்குக் கொண்டு செல்வதன் மூலம், கிராமிய சிறு மற்றும் நடுத்தர அளவிலான உற்பத்திகளின் தரம் மற்றும் நன்மதிப்பை உயர்த்த முடியும் என்றும், இதன் மூலம் உள்நாட்டு மற்றும் வெளிநாட்டு சந்தைகளை வெல்வதற்கு விதாத்தா திட்டம் வழிகாட்டும் என்றும் கூறினார். விதாத்தா திட்டத்தை மேலும் விரிவுபடுத்தி, எதிர்காலத்தில் விதாத்தா நிலையங்களை நுண் சேவைகள் மற்றும் ஆதரவு மையங்களாக மாற்றி, அதிகளவிலான விதாத்தா தொழில்முயற்சியாளர்களை உருவாக்கி தேசிய பொருளாதாரத்தை வலுப்படுத்துவதே இலக்காகும் என்றும் அவர் தெரிவித்தார்.

இந்நிகழ்வில் களுத்துறை மாவட்ட நாடாளுமன்ற உறுப்பினர் நந்தன பத்மகுமார, களுத்துறை மாவட்ட செயலாளர் எஸ்.பி. ஹேரத், அறிவியல் மற்றும் தொழில்நுட்ப அமைச்சின் அதிகாரிகள், விதாத்தா நிலைய அதிகாரிகள், தொழில்முயற்சியாளர்கள், ஆசிரியர்கள், பாடசாலை மாணவர்கள் உள்ளிட்ட பெருந்திரளானோர் கலந்துகொண்டனர்.