ஒரு கோழிக் கால் 3.50 டாலர்.. இரண்டு கால்கள் 7 டாலர்.. கோழிக் கால்களுக்கான தொழிற்சாலை திறக்கப்படும் – நாமல்
இலங்கையின் கோழி வளர்ப்புத் துறைக்கு அதிக மதிப்பைச் சேர்க்கும் வகையில், கோழி இறைச்சி மற்றும் கோழிக் கால்களை ஏற்றுமதி செய்வதை இலக்காகக் கொண்டு அடுத்த சில மாதங்களில் பல புதிய தொழிற்சாலைகள் திறக்கப்படவுள்ளதாக விவசாய மற்றும் கால்நடை வளங்கள் பிரதி அமைச்சர் நாமல் கருணாரத்ன தெரிவித்துள்ளார்.
தனியார் துறையின் பங்களிப்புடன் ஆரம்பிக்கப்படவுள்ள இந்தத் திட்டத்தின் கீழ், சர்வதேச தரத்திற்கு ஏற்ப கோழி இறைச்சியைச் சுத்தப்படுத்தி, பொதி செய்து வெளிநாட்டுச் சந்தைக்கு அனுப்பத் திட்டமிடப்பட்டுள்ளது.
இதன்போது, நுண்ணுயிரியல் செயல்முறைகளை அறிவியல் பூர்வமாகக் கட்டுப்படுத்தி, உயர்தரப் பொருட்களை ஏற்றுமதி செய்ய நடவடிக்கை எடுக்கப்படும் என்று அமைச்சர் குறிப்பிட்டுள்ளார்.
குறிப்பாக, சீனா போன்ற நாடுகளில் கோழிக் கால்களுக்கு இருக்கும் மிகப்பெரிய தேவையை கருத்திற் கொண்டு, அதற்கென தனியானதொரு தொழிற்சாலையும் நிறுவப்படவுள்ளது.
சர்வதேச சந்தையில் இதற்கு நிலவும் அதிக மதிப்பு குறித்துக் கருத்துத் தெரிவித்த அமைச்சர், தற்போதைய விலைகளின்படி ஒரு கோழிக் கால் சுமார் 3.50 அமெரிக்க டாலர் மதிப்பைக் கொண்டுள்ளதாகச் சுட்டிக்காட்டினார்.
“ஒரு கோழியின் இரண்டு கால்கள் சுமார் 7 டாலர்கள் ஆகும். தற்போதைய செலாவணி வீதத்தின்படி இது 2,000 ரூபாய்க்கும் அதிகமான மதிப்புடையது. இது நமது நாட்டின் கோழி வளர்ப்புத் துறைக்குக் கிடைக்கும் மிக உயர்ந்த கூடுதல் மதிப்பாகும் (value addition),” என்றும் நாமல் கருணாரத்ன மேலும் தெரிவித்தார்.
இந்த புதிய தொழிற்சாலைகள் திறக்கப்படுவதன் மூலம், இதுவரை வீணாகிய கோழிக் கால்கள் போன்ற உப பொருட்களின் மூலம் நாட்டிற்கு பெருமளவிலான அந்நியச் செலாவணியை ஈட்ட முடியும் என அரசாங்கம் எதிர்பார்க்கிறது.
