பிரபல பாதாள உலக தலைவர் கஞ்சிப்பான இம்ரான் கைது செய்யப்பட்டுள்ளதாக அறிவிக்கப்படுகிறது.
இன்னும் சில தினங்களில் அவர் இத்தாலியில் இருந்து இலங்கைக்கு கொண்டுவரப்படுவார் என்று பாதுகாப்பு பிரதியமைச்சர் அருண ஜெயசேகர தெரிவித்துள்ளார்.
ஹம்பாந்தோட்டையில் நடைபெற்ற கூட்டமொன்றில் உரையாற்றிய அவர், இன்டர்போல் (Interpol) சிவப்பு எச்சரிக்கை விடுக்கப்பட்டிருந்த 58 குற்றவாளிகள் இதுவரை இலங்கைக்கு அழைத்து வரப்பட்டுள்ளதாகத் தெரிவித்தார்.
முந்தைய அரசாங்கத்திலிருந்த அரசியல்வாதிகள் ஆபத்தான குற்றவாளிகள் மற்றும் எல்.டீ.டீ.ஈ (LTTE) அமைப்பின் முக்கிய நபருடன் தொடர்புகளைப் பேணி வந்ததாகக் குற்றம்சாட்டிய பாதுகாப்பு பிரதி அமைச்சர், ஓய்வுபெற்ற மேஜர் ஜெனரல் அருண ஜெயசேகர, அக்காலகட்டத்தில் சட்டத்தின் ஆட்சி எந்த நிலையில் இருந்தது என்பது குறித்து கேள்விகளை எழுப்பினார்.
முக்கிய பாதாள உலகக் குழுவினர் மற்றும் போதைப்பொருள் கடத்தல் சந்தேகநபர்கள் உட்பட சிவப்பு எச்சரிக்கை விடுக்கப்பட்ட 58 ஆபத்தான குற்றவாளிகள் இலங்கைக்கு மீண்டும் கொண்டுவரப்பட்டுள்ளதாக அவர் கூறினார்.
அரசாங்கம் தற்போது பிரதான குற்றவியல் வலைப்பின்னல்களின் தலைவர்களை இலக்கு வைத்து அவர்களை முடக்கி வருவதாகத் தெரிவித்த ஜெயசேகர, இந்த நடவடிக்கைகள் ஒழுங்கமைக்கப்பட்ட குற்றங்களில் ஈடுபடுபவர்கள் மத்தியில் அச்சத்தை ஏற்படுத்தியுள்ளதாக உரிமை கோரினார்.
மிகவும் ஆபத்தான குற்றவாளிகளை மீண்டும் இலங்கைக்கு கொண்டு வருவதற்கு கணிசமான முயற்சிகள் தேவைப்பட்டதாக வலியுறுத்திய அவர், அரசாங்கத்தின் இந்த நடவடிக்கைகள் சட்டத்தின் அதிகாரத்தையும் மேலாதிக்கத்தையும் வெளிப்படுத்துவதாகக் கூறினார்.
“அதிட்டான” முப்படை கூட்டமைப்பின் (Adhitana Tri-Forces Collective) ஹம்பாந்தோட்டை மாவட்டக் கூட்டத்தில் உரையாற்றும் போதே அவர் கருத்துக்களைத் தெரிவித்தார்.
