அரசு முன்வைத்துள்ள ஊழல் எதிர்ப்பு சட்டத் திருத்தத்தால் சொத்துக்கள் மறைக்கப்படுகின்றன.. – IMF எதிர்ப்பு
2023 ஆம் ஆண்டின் 9 ஆம் இலக்க ஊழல் எதிர்ப்புச் சட்டத்தைத் திருத்துவதற்காக அரசாங்கத்தால் முன்வைக்கப்பட்டுள்ள புதிய சட்டமூலம் மூலம், சொத்துக்கள் மற்றும் பொறுப்புக்களை வெளிப்படுத்தும் வெளிப்படைத்தன்மை மற்றும் வலுவான பொறிமுறை கடுமையாகப் பலவீனமடைவதாக உள்நாட்டு மற்றும் சர்வதேச சிவில் அமைப்புகள் பல கவலை தெரிவித்துள்ளன.
ட்ரான்ஸ்பேரன்சி இன்டர்நேஷனல் ஸ்ரீலங்கா (TISL) நிறுவனம், மாற்றுக் கொள்கைகளுக்கான மையம் (CPA) உள்ளிட்ட 86 சிவில் அமைப்புகளின் கூட்டமைப்பு, இந்த யோசனையளிக்கப்பட்ட திருத்தங்கள் காரணமாகப் பிரஜைகளின் தகவல் அறியும் உரிமை மற்றும் பேச்சுரிமைக்குக் கடுமையான தடைகள் ஏற்படும் என்று சுட்டிக்காட்டுகின்றன.
கடந்த ஆகஸ்ட் 19 ஆம் திகதி பாராளுமன்றத்தில் சமர்ப்பிக்கப்பட்ட இந்தச் சட்டமூலத்தின் மூலம் மூலச் சட்டத்தின் 18 பிரிவுகளைத் திருத்துவதற்கு யோசிக்கப்பட்டுள்ளது.
இந்தச் சட்டமூலம் தொடர்பாக அரசாங்கத்திற்கும் சர்வதேச நாணய நிதியத்திற்கும் (IMF) இடையே தற்போது சில சிறப்புப் பேச்சுவார்த்தைகள் நடைபெற்று வருகின்றன.
இதன்போது, யோசனையளிக்கப்பட்ட சில திருத்தங்களால் சொத்துக்களை வெளிப்படுத்தும் நடைமுறை பலவீனமடையக்கூடும் என்றும், நீதிமன்றத்தின் சுயாதீனத்தன்மை தொடர்பில் கேள்விகள் எழக்கூடும் என்றும் சர்வதேச நாணய நிதியம் சுட்டிக்காட்டியுள்ளதாகக் கூறப்படுகிறது. இதற்கமைய, சர்ச்சைக்குரிய சில யோசனைகளைத் திரும்பப் பெற நேரிடும் என்றும் தெரிவிக்கப்படுகிறது.
2023 ஆம் ஆண்டின் 9 ஆம் இலக்க மூலச் சட்டத்தின் மூலம் மக்கள் பிரதிநிதிகள் மற்றும் அரச அதிகாரிகளின் சொத்துக்களைப் பொதுமக்கள் மற்றும் ஊடகவியலாளர்கள் பார்வையிடுவதற்குப் பரந்த வாய்ப்பு வழங்கப்பட்டிருந்தது. எனினும், புதிய திருத்தச் சட்டமூலத்தின் 11 ஆம் பிரிவின் மூலம் தனிப்பட்ட மனிதர்களின் தனியுரிமையைப் பாதிக்கும் “ஏனைய தகவல்களை” படத்தொகுப்பு (edit) செய்து மறைப்பதற்கு ஊழல் விசாரணை ஆணைக்குழுவிற்கு வரம்பற்ற அதிகாரம் அளிக்கப்பட்டுள்ளது.
அவ்வாறு படத்தொகுப்பு செய்யப்பட்ட சொத்துப் பிரகடனத்தை, குறிப்பிட்ட நோக்கத்தைத் தவிர வேறு நோக்கத்திற்குப் பயன்படுத்துவதைக் குற்றமாக்கி, அதற்கு எதிராக அதிகபட்சமாக ஒரு லட்சம் ரூபாய் அபராதமும் ஒரு வருட சிறைத்தண்டனையும் விதிக்க யோசிக்கப்பட்டுள்ளமை தகவல் அறியும் உரிமைக்கு விடுக்கப்பட்ட பலத்த அடியாகும் எனச் சிவில் அமைப்புகள் சுட்டிக்காட்டுகின்றன.
இது தவிர, அதிகாரிகள் சொத்துக்களைப் பிரகடனப்படுத்த வேண்டிய நிறுவனங்களின் அளவுகோலில், அரசாங்கத்தின் பங்குடைமை எல்லையை 25 சதவீதத்திலிருந்து 50 சதவீதம் வரை உயர்த்தவும் திருத்தங்கள் மூலம் யோசிக்கப்பட்டுள்ளது. இதன் மூலம் அரசாங்கத்தின் கட்டுப்பாட்டில் உள்ள பல நிறுவனங்களின் அதிகாரிகள் சொத்து மற்றும் பொறுப்புக்களை வெளிப்படுத்தும் பொறுப்பிலிருந்து முழுமையாக விடுவிக்கப்படுவதாகக் கடுமையான குற்றச்சாட்டுகள் முன்வைக்கப்பட்டுள்ளன.
