ஆண்களுடன் ஆண்கள் தவறான உறவுகளை வைத்துக் கொள்வதாலும் இலங்கையில் எயிட்ஸ் (HIV) தொற்றாளர்ளின் எண்ணிக்கை தொடர்ந்து அதிகரித்து வருகிறது – நாட்டில் ஒரு பெண்ணுக்கு சுமார் ஏழு ஆண்கள் என்ற விகிதத்தில் HIV தொற்றுகள் பதிவாகின்றன
இலங்கையில் எச்.ஐ.வி (HIV) தொற்றுகளின் எண்ணிக்கை தொடர்ந்து அதிகரித்து வருவதாக சுகாதார நிபுணர்கள் எச்சரித்துள்ளனர். அதனுடன் பால்வினை நோய்களான சிபிலிஸ் (Syphilis), ஹெபடைடிஸ் பி (Hepatitis B) மற்றும் ஹெபடைடிஸ் சி (Hepatitis C) போன்றவையும் பொது சுகாதாரத்தில் பெரிய அச்சுறுத்தலாக மாறி வருகின்றன.
இலங்கை பால்வினை மற்றும் எச்.ஐ.வி மருத்துவக் கல்லூரியின் (SLCoSHH) தலைவரும், சிரேஷ்ட வெனிரியலாளருமான டொக்டர் நிமாலி ஜயசூரிய இதனைத் தெரிவித்துள்ளார். சுகாதார மற்றும் வெகுசன ஊடக அமைச்சின் ஏற்பாட்டில் நடைபெற்ற ஊடகவியலாளர் சந்திப்பிலேயே அவர் இந்தத் தகவல்களை வெளியிட்டுள்ளார்.
2021 ஆம் ஆண்டு வரை எச்.ஐ.வி மற்றும் ஏனைய பால்வினை நோய்களை இலங்கை வெற்றிகரமாகக் கட்டுப்படுத்தியிருந்தது. எனினும், கோவிட்-19 தொற்றுநோய் பரவல் காரணமாக இந்தத் தடுப்பு மற்றும் கட்டுப்பாட்டு நடவடிக்கைகள் பாதிக்கப்பட்டுள்ளதாக அவர் சுட்டிக்காட்டியுள்ளார்.
இணையதளங்களின் பயன்பாடு அதிகரிப்பு, பொருளாதார நெருக்கடி, போதைப்பொருள் பாவனை மற்றும் நரம்பு ஊசிகள் மூலம் போதைப்பொருளைப் பாவிப்போர் எண்ணிக்கை அதிகரிப்பு போன்ற காரணங்களினாலேயே இந்தத் தொற்றுகள் அதிகரித்து வருவதாக அவர் குறிப்பிட்டுள்ளார்.
எச்.ஐ.வி தொற்றுகள் அனைத்து வயதுப் பிரிவினர் மற்றும் அனைத்துத் தொழில்துறையினர் மத்தியிலும் பதிவாகி வருகின்றன. எனினும், கொழும்பு மாவட்டத்திலேயே அதிக எண்ணிக்கையான தொற்றாளர்கள் பதிவாகியுள்ளனர்.
பெண்களுடன் ஒப்பிடும்போது ஆண்களுக்கே எச்.ஐ.வி தொற்று அதிகமாக உறுதிப்படுத்தப்பட்டுள்ளது. அதாவது, ஒரு பெண்ணுக்கு சுமார் ஏழு ஆண்கள் என்ற விகிதத்தில் தொற்றுகள் பதிவாகியுள்ளன.
ஆண்களுடன் உறவு கொள்ளும் ஆண்களிடையே நிலவும் பாதுகாப்பற்ற பாலினச் சேர்க்கை மற்றும் நரம்பு ஊசி மூலம் போதைப்பொருள் பாவிப்பது போன்றவையே எச்.ஐ.வி பரவலுக்கான முக்கிய காரணங்களாகத் தொடர்கின்றன என்று டொக்டர் ஜயசூரிய தெரிவித்துள்ளார்.
இதுதவிர, ஏனைய பால்வினை நோய்களும் கடுமையாக அதிகரித்து வருவதாக அவர் எச்சரித்துள்ளார்.
2021 ஆம் ஆண்டுக்கு முன்பு வரை ஆண்டுக்கு 80 முதல் 100 வரை மட்டுமே பதிவாகியிருந்த சிபிலிஸ் நோயாளர்களின் எண்ணிக்கை, தற்போது ஆண்டுக்கு சுமார் 1,500 ஆக அதிகரித்துள்ளது.
2026 ஆம் ஆண்டில் பதிவான ஹெபடைடிஸ் பி நோயாளர்களின் எண்ணிக்கை முந்தைய ஆண்டைக் காட்டிலும் இரு மடங்காக உயர்ந்துள்ளது. அதேவேளை, ஹெபடைடிஸ் சி நோயாளர்களின் எண்ணிக்கை 2025 ஆம் ஆண்டில் ஏறக்குறைய நான்கு மடங்காக அதிகரித்துள்ளது.
இத்தகைய கவலைக்கிடமான சூழ்நிலைகளிலும், புதிய பக்கவிளைவற்ற மருந்துகள் மற்றும் எளிய சிகிச்சை முறைகள் உள்ளிட்ட எச்.ஐ.விக்கான சிகிச்சைகளை இலங்கை தொடர்ந்தும் இலவசமாக வழங்கி வருவதாக அவர் குறிப்பிட்டுள்ளார்.
இருப்பினும், தற்போதுள்ள விழிப்புணர்வு மற்றும் தடுப்பு நடவடிக்கைகள் இந்த வளர்ந்து வரும் பொது சுகாதாரச் சவாலை எதிர்கொள்ளப் போதுமானதாக இல்லை என்றும் அவர் எச்சரித்துள்ளார்.
இதற்கிடையில், இலங்கை பால்வினை மற்றும் எச்.ஐ.வி மருத்துவக் கல்லூரியின் 31 ஆவது வருடாந்திர மாநாடு, பிரித்தானிய எச்.ஐ.வி சங்கத்தின் கூட்டுடன் கொழும்பு ஐ.டி.சி ரத்னதீப ஹோட்டலில் அக்டோபர் 29 முதல் 31 வரை நடைபெறவுள்ளமை குறிப்பிடத்தக்கது.
