உலகின் அதிக மறைமுக வரிகளைக் கொண்ட நாடுகளின் பட்டியலில் இலங்கை !!

அதிகாரப்பூர்வ புள்ளிவிவரங்கள் நாட்டின் பொருளாதாரம் மீண்டு வருவதைக் காட்டினாலும், காகிதத்தில் பதிவாகும் பொருளாதார வளர்ச்சிக்கும், அடிமட்டப் பொதுமக்களால் அனுபவிக்கப்படும் உண்மையான வாழ்க்கை எதார்த்தத்திற்கும் இடையே தெளிவான முரண்பாடும் இடைவெளியும் உள்ளதாக முதலீடு மற்றும் கொள்கை ஆலோசனை நிபுணர் இந்திக ஹெட்டியாராச்சி ‘டெய்லி மிரர்’ பத்திரிகைக்குத் தெரிவித்துள்ளார்.

சமீபத்திய அதிகாரப்பூர்வ தரவுகளின்படி, 2026 ஆம் ஆண்டின் முற்பகுதியில் நாட்டின் பொருளாதாரம் 4.7 சதவீத வளர்ச்சியை எட்டியுள்ளதுடன், பல பொருளாதார ஆய்வாளர்கள் இதனை நிலையான பொருளாதார மீட்சியின் அறிகுறியாக விளக்கியுள்ளனர். எவ்வாறாயினும், சாதாரண பொதுமக்களுக்கு அந்தப் பொருளாதார வளர்ச்சி எந்த வகையிலும் உணரப்படவில்லை என்று சுட்டிக்காட்டும் அவர், பணவீக்கம் 8 சதவீதத்தை தாண்டியுள்ளதால் வாழ்க்கைச் சுமை தாங்க முடியாத நிலையை எட்டியுள்ளதாகக் கூறுகிறார்.

சமீபத்தில் நடத்தப்பட்ட ஆய்வொன்றின்படி, நாட்டின் மொத்தக் குடும்ப அலகுகளில் வெறும் 25 சதவீதமானோர் மட்டுமே தங்களது அடிப்படை வாழ்க்கைச் செலவுகளைப் பூர்த்தி செய்வதற்குப் போதுமான வருமானத்தைப் பெறுகின்றனர் என்றும் டெய்லி மிரர் இதழில் வெளியான அந்த ஆய்வறிக்கையில் குறிப்பிடப்பட்டுள்ளது.

2026 ஆம் ஆண்டின் முதலாம் காலாண்டுக்கான மொத்த உள்நாட்டு உற்பத்தி (GDP) தரவுகளைப் பகுப்பாய்வு செய்து ஹெட்டியாராச்சி சுட்டிக்காட்டுவது என்னவெனில், பெயரளவுப் பொருளாதாரம் 11.2 சதவீதத்தால் விரிவடைந்திருந்தாலும், உண்மையான உற்பத்தி அல்லது சேவைப் பொருளாதார நடவடிக்கைகளான மொத்த மதிப்புச் சேர்ப்பு (GVA) வளர்ச்சி அடைந்துள்ளது வெறும் 8.6 சதவீதம் மட்டுமே ஆகும்.

மொத்த உள்நாட்டு உற்பத்திக்கும் மொத்த மதிப்புச் சேர்ப்பிற்கும் இடையே இந்த வேறுபாடு ஏற்படுவதற்குக் முக்கிய காரணம், நிகர நுகர்வு வரி வருமானம் 34.6 சதவீத மாபெரும் பெறுமதியால் அதிகரித்தமையே ஆகும்.

இந்த நிலையை உண்மையான பொருளாதார மாற்றத்தை விட ஒரு ‘பொருளாதார அதிர்ச்சி’ (Economic Shock) என வர்ணிக்கும் அவர், 2023 ஆம் ஆண்டு முதல் நடைமுறைப்படுத்தப்பட்டு வரும் பொருளாதாரத்தைச் சுருக்கும் நிதிக் கொள்கைகள் காரணமாக மொத்த உள்நாட்டு உற்பத்திக்கும் மதிப்புச் சேர்ப்பிற்கும் இடையிலான இடைவெளி முன்னெப்பொழுதையும் விட விரிவடைந்துள்ளதாகச் சுட்டிக்காட்டுகிறார்.

தற்போதுள்ள மறைமுக அல்லது நுகர்வு வரிகளின் அளவு மொத்த உள்நாட்டு உற்பத்தியில் 12 சதவீதமாகும் என டெய்லி மிரர் கட்டுரை சுட்டிக்காட்டுகிறது.

இதன் பொருள், நாட்டில் உற்பத்தியாகும் ஒவ்வொரு 100 ரூபா பெறுமதியான பொருட்கள் மற்றும் சேவைகளுக்காகவும் அரசாங்கம் சராசரியாக 12 ரூபாவை மறைமுக வரியாக அறவிடுகிறது என்பதாகும். தனிநபர்களும் வணிக நிறுவனங்களும் செலுத்தும் நேரடி வருமான வரிகளுக்கு மேலதிகமாக இந்த வரி வசூலிக்கப்படுவதால், நாட்டில் விற்கப்படும் ஒவ்வொரு பொருளின் விலையும் உயர்வதற்கும், நுகர்வோர் தேவை பெருமளவில் வீழ்ச்சியடைவதற்கும் இது நேரடியாகக் காரணமாகியுள்ளது. அதன்படி, காகிதத்தில் காட்டப்படும் பொருளாதார வளர்ச்சி மக்களுக்குத் தெரியாமல் இருப்பதற்கு அரசாங்கத்தின் வரிசுக் கொள்கையே முக்கிய காரணம் என்பது தெளிவாகிறது.

இலங்கையின் மறைமுக வரி விகிதம் உலகின் உயர்ந்த விகிதங்களுக்குள் இருப்பதாகச் சுட்டிக்காட்டும் ஹெட்டியாராச்சி, அதிகப்படியான மறைமுக வரிகள் மற்றும் சுருங்கும் நிதிக் கொள்கைகள் காரணமாக குறுகிய மற்றும் நடுத்தர காலத்தில் பொருட்களின் விலைகள் அதிகரித்து பொருளாதாரத் தேவை வீழ்ச்சியடையும் என வலியுறுத்துகிறார். இத்தகைய வரி முறையை நீண்டகாலம் பேணிச் செல்வதன் மூலம் நாட்டின் ஏற்றுமதிப் போட்டித்தன்மை நழுவிப்போய், ‘பொருளாதார தேக்கநிலையுடன் கூடிய பணவீக்கம்’ (Stagflation) உருவாகலாம் என அவர் எச்சரிக்கிறார்.

எதிர்வரும் இரண்டு ஆண்டுகளுக்குள் இலங்கையின் ஒட்டுமொத்த பொருளாதார வளர்ச்சி மந்தமடைவதற்கும் பணவீக்கம் அதிகரிப்பதற்கும்ரிய அறிகுறிகள் ஏற்கனவே வெளிப்பட்டு வருவதாகவும், அதன் மிகக் கடுமையான விளைவு நாட்டின் நடுத்தர வர்க்க மக்கள் தொகை படிப்படியாகச் சுருங்கி வறுமை தீவிரமாக அதிகரிப்பதாகவும் இருக்கும் என்றும் அவர் மேலும் எச்சரித்துள்ளார்.