தரமற்ற “யானை வெடிகளை” (elephant crackers) பயன்படுத்துவதே முக்கிய காரணமாக அமைந்து, இலங்கையில் சுமார் 30 சதவீதமான யானைகளுக்குக் காது கேட்கும் திறன் இழக்கப்பட்டுள்ளதாக விவசாய மற்றும் கால்நடைத்துறை பிரதி அமைச்சர் நாமல் கருணாரத்ன தெரிவித்துள்ளார்.
யானைகள், குரங்குகள், காட்டுப் பன்றிகள், முள்ளம்பன்றிகள் மற்றும் மயில்கள் சம்பந்தப்பட்ட அதிகரித்து வரும் மனித-விலங்கு மோதல்கள் குறித்து விவாதிப்பதற்காக வனவிலங்கு அதிகாரிகளுக்கு மோட்டார் சைக்கிள்களை வழங்கும் நிகழ்வில் கலந்துகொண்டு உரையாற்றும்போதே அவர் மேற்கண்டவாறு குறிப்பிட்டார்.
சில பகுதிகளில் மனித-யானை மோதலை விட மனித-குரங்கு மோதல் தீவிரமடைந்துள்ளதாகத் தெரிவித்த அவர், இந்த பரந்த அளவிலான மோதல்களால் விவசாய உற்பத்திப் பொருட்கள் கடுமையாகப் பாதிக்கப்படுவதாகவும் சுட்டிக்காட்டினார்.
வனவிலங்குகளால் விவசாயிகளின் பயிர்கள் நாசமாக்கப்படுவது நாட்டின் விவசாய உற்பத்திக்கு ஒரு குறிப்பிடத்தக்க சவாலாக மாறியுள்ளதாக அவர் கூறினார். மேலும், துப்பாக்கிச் சூடுகள் மற்றும் பிற மனித நடவடிக்கைகளால் வனவிலங்குகள், குறிப்பாக யானைகள் கடுமையாகப் பாதிக்கப்படுவதைக் குறிப்பிட்ட அவர், பல விலங்குகள் காயமடைந்து தமது உடலில் குண்டுகளுடன் வாழ்வதாகவும் தெரிவித்தார்.
யானை வெடிகளின் பயங்கரமான சத்தங்கள் குட்டி யானைகள் உட்பட அனைத்து யானைகளையும் பாதிப்பதாகவும், இதன் காரணமாக சில யானைகள் காலப்போக்கில் தமது கேட்கும் திறனை முழுமையாக இழந்துவிடுவதாகவும் அவர் மேலும் குறிப்பிட்டார்.
காடுகளில் உணவு மற்றும் தண்ணீர் பற்றாக்குறை நிலவுவதும், கிராமப் பகுதிகளில் உணவு மற்றும் தண்ணீர் எளிதில் கிடைப்பதும் தான் விலங்குகள் மனித வசிப்பிடங்களுக்குள் நுழைவதற்கு முக்கியக் காரணம் என்று நாமல் கருணாரத்ன சுட்டிக்காட்டினார். மனித-விலங்கு மோதல்களைக் குறைக்க வன வாழ்விடங்களுக்குள்ளேயே போதுமான உணவும் நீரும் கிடைப்பதை உறுதி செய்வது அவசியமானது என்றும் அவர் வலியுறுத்தினார்.
