முன்பு மூடப்பட்டு தற்போது திறக்கப்பட்டுள்ள சப்புகஸ்கந்த எண்ணெய் சுத்திகரிப்பு நிலையத்தால் கடந்த 9 மாதங்களில் 417 மில்லியன் அமெரிக்க டாலர்கள் லாபம்.. மேலும் பெட்ரோலிய கூட்டுத்தாபனத்திற்கு 28 பில்லியன் ரூபாய் இலாபம் – விரைவில் நாட்டில் எரிபொருள் விலைகள் குறைக்கப்படும் ; சிபெட்கோ தலைவர்

சப்புகஸ்கந்த எண்ணெய் சுத்திகரிப்பு நிலையம் இந்த ஆண்டின் முதல் ஒன்பது மாதங்களில் 417 மில்லியன் அமெரிக்க டாலர் லாபம் ஈட்டியுள்ளதாக இலங்கை பெட்ரோலிய கூட்டுத்தாபனத்தின் (CPC) தலைவர் டி.ஜே. ராஜகருணா தெரிவித்துள்ளார்.
.

அரசாங்க தகவல் திணைக்களத்தினால் ஏற்பாடு செய்யப்பட்ட விசேட நேர்காணலின் போதே அவர் இந்த தகவலை வெளியிட்டார்.
.
முன்னதாக அமைச்சரவை முடிவின்படி மூடப்பட்டு, இலங்கை பெட்ரோலிய கூட்டுத்தாபனத்திலிருந்து நீக்குவதற்கு அடையாளம் காணப்பட்ட இந்த சுத்திகரிப்பு நிலையம், இக்காலகட்டத்தில் கணிசமான லாபத்தை ஈட்டி தன் திறனை நிரூபித்துள்ளதாக ராஜகருணா குறிப்பிட்டார்.
.
மேலும், இந்த ஒன்பது மாத காலத்தில் சுத்திகரிப்பு நிலையத்தின் செயல்பாடுகள் மூலம் நாட்டிற்கு 1 பில்லியன் அமெரிக்க டாலருக்கும் அதிகமான அந்நிய செலாவணி சேமிக்கப்பட்டுள்ளதாகவும் அவர் தெரிவித்தார்.
.

நடப்பு பொருளாதார நெருக்கடிகளுக்கு மத்தியிலும், இலங்கை பெட்ரோலிய கூட்டுத்தாபனம் முதல் ஒன்பது மாதங்களில் 28 பில்லியன் ரூபாய் லாபத்தை பதிவு செய்துள்ளது.
.
கூட்டுத்தாபனம் திட்டமிட்ட உத்தியின் அடிப்படையில் செயல்பட்டு வருவதாகவும், ஆண்டின் இறுதிக்குள் 28 பில்லியன் முதல் 30 பில்லியன் ரூபாய் வரை லாபத்தை எட்டும் என எதிர்பார்ப்பதாகவும் அவர் மேலும் கூறினார்.
.
இதனிடையே, உலக சந்தையில் அண்மையில் ஏற்பட்டுள்ள எரிபொருள் விலை குறைவின் பலன்கள் வரும் காலத்தில் நுகர்வோருக்கு வழங்கி குறைக்கப்படும் என ராஜகருணா தெரிவித்தார்.
.

நீண்ட காலமாக சர்வதேச சந்தையில் எண்ணெய் விலைகள் உயர்ந்து வந்த நிலையில், சமீபத்தில்தான் விலை குறைவு பற்றிய செய்திகள் வெளியாகி உள்ளதாகவும், நிலைமையை கூட்டுத்தாபனம் தீவிரமாக கண்காணித்து வருவதாகவும் அவர் சுட்டிக்காட்டினார்.
.
உலக சந்தை விலை குறைப்பின் நன்மைகள் முழுமையாக கைக்கு வந்தவுடன், அவை உடனடியாக நுகர்வோருக்கு வழங்கப்படும் என்றார்.
.
தற்போதைய உள்நாட்டு எரிபொருள் விலைகளை பிப்ரவரி மாதத்துடன் ஒப்பிட்டு பேசிய ராஜகருணா, பெட்ரோல் விலை லிட்டருக்கு 292 ரூபாயில் இருந்து 424 ரூபாயாகவும், டீசல் விலை லிட்டருக்கு 281 ரூபாயில் இருந்து 397 ரூபாயாகவும் உயர்ந்துள்ளதாக தெரிவித்தார்.
.
சர்வதேச சந்தையில் ஏற்பட்ட விலை உயர்வுடன் ஒப்பிடும்போது இந்த உள்நாட்டு விலை உயர்வு குறைவாகவே உள்ளது என்றும், அரசின் மானியங்களே இதற்கு காரணம் என்றும் அவர் விளக்கினார்.
.
ஏப்ரல், மே மற்றும் ஜூன் மாதங்களில் அரசு டீசலுக்கு லிட்டருக்கு 100 ரூபாயும், பெட்ரோலுக்கு லிட்டருக்கு 20 ரூபாயும் மானியமாக வழங்கியதாக ராஜகருணா கூறினார்.
.
கடந்த மாதத்தில் டீசலுக்கு லிட்டருக்கு 70 ரூபாய் மானியம் வழங்கப்பட்டதாகவும், நடப்பு மாதத்திற்கான மானியங்களுக்காக 41 பில்லியன் ரூபாய் ஒதுக்கப்பட்டுள்ளது என்றும் அவர் தெரிவித்தார்.
.
அரசாங்கம் வழங்கிய இந்த மானியங்கள் காரணமாகவே, சர்வதேச சந்தை விலைகளுக்கு ஏற்ப உயர வேண்டிய உள்நாட்டு எரிபொருள் விலைகள் பெருமளவில் கட்டுக்குள் வைக்க முடிந்தது என அவர் கூறினார்.