இலங்கையின் மின்சாரக் கட்டமைப்பின் (Power Grid) ஸ்திரத்தன்மை தற்போது கடும் ஆபத்தில் உள்ளதாகவும், கிராமப்புறப் பகுதிகளில் எவ்வித முன் அறிவிப்புமின்றி எந்த நேரத்திலும் மின்வெட்டு ஏற்படுவதற்கான சாத்தியக்கூறுகள் நிலவுவதாகவும் மின்சக்தி நிபுணர் விதுர ரலபனாவ தெரிவித்துள்ளார்.
தனது ஃபேஸ்புக் (Facebook) பக்கத்தில் பதிவொன்றை மேற்கொண்டு அவர் இதனை வலியுறுத்தியுள்ளார்.
மின்சார அமைப்பின் ஸ்திரத்தன்மை குறித்து சில ஊடகங்கள் வெளியிடும் அறிக்கைகளைக் விமர்சித்த ரலபனாவ, தற்போதைய பிரச்சினை நீர் பற்றாக்குறை அல்ல, மாறாக மின்சார உற்பத்தித் திறன் தொடர்பிலானது எனச் சுட்டிக்காட்டியுள்ளார். நீர்த்தேக்கங்களின் நீர்மட்டம் எவ்வாறாக இருப்பினும், மின்சாரக் கட்டமைப்பின் ஸ்திரத்தன்மையைப் பேணுவது தற்போது கடினமாக உள்ளதாக அவர் கருதுகிறார்.
மின்சாரக் கட்டமைப்பு ஒன்றின் ஸ்திரத்தன்மையை உறுதிசெய்வதற்காகப் பயன்படுத்தப்படும் ‘N-1’ என்ற நிபந்தனையின்படி, கட்டமைப்பில் உள்ள மிகப்பெரிய மின் உற்பத்தி நிலையம் திடீரென செயலிழந்தால், அதனை ஈடுசெய்யும் வகையில் அந்த மின் உற்பத்தி நிலையத்தின் உற்பத்தித் திறனுக்குச் சமமான உபரி மின்சாரம் எப்போதுமே கையிருப்பில் இருக்க வேண்டும்.
இலங்கை மின்சாரக் கட்டமைப்பின் மிகப்பெரிய மின் உற்பத்தி நிலையமான ‘சோபதனவி’ (Sobadhanawe) மின் உற்பத்தி நிலையத்தின் திறன் 320 மெகாவாட் ஆகும். குறைந்தது அந்த அளவிலான மின்சாரத்தைக் கையிருப்பில் பேண வேண்டும். ஆனால், கடந்த 11 நாட்களில் 5 நாட்களில் இந்த குறைந்தபட்சத் தேவையைப் பூர்த்தி செய்ய அதிகாரிகள் தவறிவிட்டதாக அவர் தரவுகளுடன் சுட்டிக்காட்டியுள்ளார்.
மின்சாரத்திற்கான தேவை மேலும் 100 மெகாவாட்டால் அதிகரித்தால், மின்சாரக் கட்டமைப்பு முற்றாகச் செயலிழப்பதைத் தடுப்பதற்காக, தேசிய மின் அமைப்பின் செயல்பாட்டு மையம் (National System Control Centre) எவ்வித முன் அறிவிப்போ அல்லது ஒழுங்குமுறை அனுமதியோ இன்றி கிராமப்புறங்களில் மின்சாரத்தைத் துண்டிக்கும் நடவடிக்கையை மேற்கொள்ளக்கூடும் என்றும் அவர் எச்சரித்துள்ளார்.
