திட்வா சூறாவளியினால் சேதமடைந்த புனரமைக்கவும் மறுசீரமைக்கவும் இலங்கைக்கு 110 மில்லியன் அமெரிக்க டொலர்களை உலக வங்கி வழங்குகிறது
டிட்வா’ (Ditwah) சூறாவளியினால் மிகக் கடுமையாகச் சேதமடைந்த 600 கிலோமீற்றர் வீதிகளைப் புனரமைக்கவும் மறுசீரமைக்கவும் இலங்கைக்காக 110 மில்லியன் அமெரிக்க டொலர்களை உலக வங்கி இன்று அங்கீகரித்துள்ளது.
சர்வதேச அபிவிருத்திச் சங்கத்தின் (IDA) நெருக்கடி கால நிவாரணப் பிரிவின் மூலம் வழங்கப்படும் நிதியுதவியானது, சூறாவளியினால் மிகவும் மோசமாகப் பாதிக்கப்பட்ட சமூகங்களில் உள்ள சந்தைகள், பாடசாலைகள் மற்றும் சுகாதார மையங்களுக்கான போக்குவரத்து இணைப்புகளை மீள ஏற்படுத்துவதற்கு முன்னுரிமை அளிக்கும்.
அடிக்கடி ஏற்படும் தீவிர காலநிலை மாற்றங்களைத் தாங்கும் வகையில், மேம்படுத்தப்பட்ட வடிகால் அமைப்புகள், மண்சரிவு பாதுகாப்பு நடவடிக்கைகள் மற்றும் புதுப்பிக்கப்பட்ட பொறியியல் நுட்பங்கள் அடங்கிய காலநிலை மாற்றத்திற்குத் தாக்குப் பிடிக்கக்கூடிய தரத்தில் இந்த வீதிகள் மறுசீரமைக்கப்படவுள்ளன.
“டிட்வா சூறாவளி இலங்கையின் போக்குவரத்து இணைப்பில் பெரும் பாதிப்பை ஏற்படுத்தியுள்ளது. இருப்பினும், இந்த வீதிகளை மீண்டும் கட்டியெழுப்புவது, அவற்றை மேலும் வலுவாக உருவாக்குவதற்கான ஒரு வாய்ப்பை நமக்கு வழங்குகிறது” என்று உலக வங்கி குழுமத்தின் இலங்கைக்கான முகாமையாளர் கெவோர்க் சர்கிஸியன் (Gevorg Sargsyan) தெரிவித்தார்.
“இது வெறும் வீதிகளைச் சரிசெய்வது மட்டுமல்ல, வாழ்வாதாரத்தை மீளமைப்பது, விவசாயிகளைச் சந்தைகளுடனும் குடும்பங்களை அத்தியாவசிய சேவைகளுடனும் மீண்டும் இணைப்பதுடன், எதிர்காலப் பாதிப்புகளைத் தாங்கக்கூடிய வகையில் உள்கட்டமைப்பை உறுதியாகக் கட்டியெழுப்புவதாகும்” என்றும் அவர் குறிப்பிட்டார்.
இந்த புதிய நிதியுதவியின் மூலம், தற்போது நடைமுறையிலுள்ள ‘உள்ளடக்கிய இணைப்பு மற்றும் அபிவிருத்தித் திட்டம்’ (ICDP) மேலும் மூன்று ஆண்டுகளுக்கு நீட்டிக்கப்பட்டுள்ளது. இதன் மூலம், இத்திட்டத்தின் கீழ் இலங்கையின் போக்குவரத்து இணைப்பிற்கான உலக வங்கியின் மொத்த முதலீடு 610 மில்லியன் அமெரிக்க டொலர்களாக உயர்ந்துள்ளது.
இவ்முதலீட்டின் மூலம் 830,000 க்கும் அதிகமான மக்கள் நேரடியாகப் பயனடைவார்கள் என்றும், எட்டு இலக்கு மாவட்டங்களில் உள்ள சுமார் இரண்டு மில்லியன் மக்களை இது சென்றடையும் என்றும் எதிர்பார்க்கப்படுகிறது.
மேலும், இப்புனரமைப்பு மற்றும் பராமரிப்புப் பணிகள் மூலம் தோராயமாக 5,671 புதிய மற்றும் மேம்படுத்தப்பட்ட வேலைவாய்ப்புகள் உருவாக்கப்படும். அதோடு, 22,000 தேயிலை, காய்கறி மற்றும் நெல் விவசாயிகளை மீண்டும் கொள்வனவு செய்வோருடனும் விநியோகச் சங்கிலிகளுடனும் இணைப்பதன் மூலம் அவர்கள் பயனடைவர்.
2025 நவம்பரில் நாட்டைத் தாக்கிய ‘டிட்வா’ சூறாவளியானது, அனைத்து 25 மாவட்டங்களிலும் உள்ள சுமார் இரண்டு மில்லியன் மக்களைப் பாதித்ததுடன், சுமார் 4.1 பில்லியன் டொலர் பெறுமதியான சேதத்தை ஏற்படுத்தியது.
போக்குவரத்துத் துறை மட்டும் தோராயமாக 973 மில்லியன் டொலர் சேதத்தைச் சந்தித்துள்ளது. இதில் சுமார் 2,000 கிலோமீற்றர் மாகாண வீதிகள், 3,500 கிலோமீற்றருக்கும் அதிகமான கிராமப்புற வீதிகள் மற்றும் சுமார் 700 பாலங்கள் அடங்கும். இதற்கான சீரமைப்புத் தேவைகள் 1.31 பில்லியன் டொலர்கள் என மதிப்பிடப்பட்டுள்ளது.
இந்தத் திட்டம் 2026-2030 ஆம் ஆண்டிற்கான இலங்கைகளுக்கான உலக வங்கி குழுமத்தின் பங்களிப்புச் சட்டகத்துடன் (Country Partnership Framework) இணங்கிச் செல்கிறது. இது மீட்சிக்கும் தனியார் துறை சார்ந்த வளர்ச்சிக்கும் மீள்திறன் கொண்ட உள்கட்டமைப்பு மற்றும் இணைப்பை முக்கிய அடித்தளமாக அடையாளம் காண்கிறது.
